Antonio Guterres – Sekretar i ri i Kombeve të Bashkuara, humb Jeremiq

5 Tetor 2016 - 17:41      

Ish-shefi i UNHCR-së, dhe ish-kryeministri i Portugalisë, Antonio Guteress është përzgjedhur në postin e sekretarit të ri të OKB-së.

Guteress do ta zëvendësojë Ban Ki Moonin e kjo u vendos pas rundit të gjashtë të zgjedhjeve që u mbajtën në Nju Jork.

Askush nga shtetet anëtare nuk ka vënë veto ndaj përzgjedhjes së tij.

Mandati i Ban skadon në fund të vitit 2016, derisa në këtë post qëndroi në dy mandate nga pesë vjet.

OKB-ja ishte shumë e interesuar që këtë vit të bëjë histori duke zgjedhur një grua në postin e të parës së organizatës por kandidatët megjithatë nuk janë renditur mirë gjatë turneve të votimit.

Guteress është politikani më i njohur ndërkombëtarisht nga Portugalia dhe gjatë karrierës së tij ka trajtuar krizat që nga Timori Lindor e deri tek kjo e refugjatëve në ditët e sotme.

Para se të merrte postin në krye të UNHCR-së ku qëndroi nga viti 2005 deri më 2015 ai ishte kryeministër socialist i Portugalisë e qeveria e tij ishte e vetmja në historinë moderne e cila kreu mandatin e plotë.

Në këtë garë ai ka mposhtur serbin Vuk Jeremiq.

Para dite AFP kishte njoftuar se kundër serbit Jeremiq do të jenë fuqitë perëndimore që kanë të drejtë vetoje në Këshillin e Sigurimit: SHBA, Britani e Madhe dhe Franca.

Kundërshtimin ndaj tij këto vendi e kishin bazuar në qëndrimin e Jeremiqit ndaj NATO-s dhe Kosovës.

Jeremiq NATO-n e kishte quajtur agresor, ndërsa për Kosovën kishte thënë se”vetëm mbi trupin e tij të vdekur do të anëtarësohej në KB”.

© KOHA. Të gjitha të drejtat janë të rezervuara.