Koordinimi i aktiviteteve, prioritet për zbardhjen e fatit për personat e pagjetur

5 Tetor 2016 - 15:24      

Zëvendësministri i Drejtësisë, Florian Dushi ka zhvilluar një takim koordinues me përfaqësues të Komisionit Qeveritar për të Pagjeturit, ku të pranishëm ishin kryesuesi i delegacionit për bisedime për personat e pagjetur, Ibrahim Makolli, Kryetari i Komisionit Qeveritar për Personat e Pagjetur, Prenk Gjetaj dhe përfaqësuesja nga Ambasada Britanike, Miranda Shala.

Vazhda e takimit u shtri rreth koordinimit dhe ndarjes së përgjegjësive mes akterëve dhe zyrave kompetente në raport me fatin e personave të pagjetur, në mënyrë që të ecet përpara në këtë segment, sidomos ndaj obligimeve në terren ku problemet shfaqen nga faktorë të ndryshëm, duke filluar nga mungesa e ekspertëve të mjaftueshëm e deri tek problemet teknike.

Dushi shprehu përkushtimin institucional për përkrahje të vazhdueshme për intensifikimin e aktiviteteve rreth fatit të personave të pagjetur, njëherësh përshëndeti edhe gatishmërinë e Ambasadës Britanike në Kosovë për ndihmën e ofruar në raport me zbardhjen e fatit të personave të pagjetur.

Zëvendësministri Dushi i njoftoi të pranishmit se “tani gjendemi në fazën e hartimit të Strategjisë për fushën e mjekësisë ligjore dhe çështja e të pagjeturve do të zë vend në këtë strategji”.

Gjatë këtij takimi u dakorduan të gjithë që intensifikimi i takimeve të këtij niveli me qëllim të koordinimit rreth punës dhe angazhimeve për fatin e personave të pagjetur do të kontribuoj edhe më tej, deri në finalizimin e këtij qëllimi. 

© KOHA. Të gjitha të drejtat janë të rezervuara.