Nderime dhe fishkëllima për Thaçin në Shqipëri

5 Tetor 2016 - 06:30      

Nderime dhe fishkëllima për presidentin e Kosovës, Hashim Thaçi, në ditën e dytë të vizitës së tij në Shqipëri. Thaçi është pritur nga kryetari i Bashkisë së Tiranës, Erion Veliaj, por më pas është vërshëllyer nga një grup i vogël që u identifikuan si studentë, ndërsa ai me nikoqirin po kryenin homazhe pranë bustit të Adem Jasharit, shkruan sot Koha Ditore.

Të rinjtë mbanin parulla në duar, ku shkruhej “Kosova është Shqipëri”, “Tradhtia i paraprin korrupsionit”, dhe “Kufiri mes nesh është Jugosllavia”.

“Ceremoninë e nderimit të memorialit të Adem Jasharit në Tiranë janë përpjekur ta prishnin një grup i vogël të rinjsh që supozohet që ishin përkrahës të Lëvizjes Vetëvendosje. Mësohet se katër apo pesë studentë me fishkëllima kanë provuar të zhvendosnin vëmendjen nga nderimet para memorialit”, u tha nga të pranishmit në aktivitet, shkruan sot më gjerësisht Koha Ditore.

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.