Fuqizimi i sundimit të ligjit, qenësor për progresin në drejtësi

4 Tetor 2016 - 16:41      

Në vazhdën e vizitës në Britaninë e Madhe, ministrja e Drejtësisë, Dhurata Hoxha, sot është takuar me drejtoreshën e Zyrës për Ballkanin Perëndimor, Fiona Mcilwham.

Bëhet e ditur se gjatë takimit ministrja Hoxha e njoftoi znj. Mcilwham për gjendjen aktuale në sektorin e drejtësisë dhe sundimit të ligjit në Kosovë. Po ashtu, e njoftoi edhe për prioritetet dhe objektivat e Ministrisë së Drejtësisë, të përcaktuara gjatë mandatit të saj në krye të këtij institucioni.

Ndër të tjera, ministrja Hoxha vuri theks të veçantë në nevojën për reformimin e mëtejmë të sistemit të drejtësisë, qoftë përmes reformave legjislative apo përpjekjeve më të mëdha për të fuqizuar zbatimin e ligjit. Ministrja Hoxha, vuri në pah rëndësinë e fuqizimit të sundimit të ligjit, si një ndër elementet kyçe për rritjen e zhvillimit ekonomik dhe tërheqjen e investitorëve.

Znj. Mcilwham shprehu përkushtimin e Zyrës për Ballkanin Perëndimor për të mbështetur Ministrinë e Drejtësisë të Kosovës në rrugën drejt reformimit të mëtejmë të sistemit të drejtësisë dhe fuqizimit të sundimit të ligjit. Ajo, siç thuhet në njoftim, vlerësoi lartë përkushtimin e ministres Hoxha dhe konsideroi se përkushtimi i saj për të fuqizuar sundimin e ligjit është qenësore për progresin në këtë sektor.

Ministrja Hoxha po qëndron në Londër me ftesë të sekretares së Shtetit për Drejtësi të Britanisë së Madhe, Liz Truss.