Prokuroria zgjeron hetimet në aferën “Pronto 2” – i përfshirë edhe Zenun Pajaziti

4 Tetor 2016 - 14:50      

Prokuroria Speciale e Kosovës ka marrë aktvendim për zgjerimin e hetimit në rastin e përgjimeve, i cili fillimisht është iniciuar kundër të pandehurit Adem Grabovci, deputet dhe ish-kryetar i Grupit Parlamentarë të Partisë Demokratike të Kosovës.

Përmes një njoftimi për media, bëhet e ditur se hetimet janë zgjeruar edhe kundër shtatë zyrtarëve të tjerë: Arbenita Pajaziti, ish- Shefe e Njësisë për furnizim në Departamentin e farmacisë në Ministrinë e Shëndetësisë, Ilhami Gashi, ish- sekretar i përgjithshëm në Ministrinë e Punëve të Brendshme, Besim Beqaj, ish- ministër në Ministrinë për Zhvillim Ekonomik, Nijazi Kryeziu, ish - Kryesues i Kuvendit në Komunën e Prizrenit, Zenun Pajaziti, deputet në Parlamentin e Kosovës, Fatmir Shurdhaj, ish - zëvendës ministër në Ministrinë e Punës dhe Mirëqenies Sociale, dhe Sedat Gashin, ish - Këshilltar politik në Ministrinë e Punëve të Brendshme.

Të gjithë të pandehurit dyshohen për kryerjen e dy veprave penale: Keqpërdorimi i pozitës apo autoritetit zyrtar nga neni 422 të KPRK dhe Shkelja e statusit të barabartë të shtetasve dhe banorëve të Republikës së Kosovës nga neni 193 paragrafi 4 lidhur me paragrafin 1 të KPRK-së. 

© KOHA. Të gjitha të drejtat janë të rezervuara.