Policia u kërkon protestuesve të lirojnë hyrjen zyrtare të MSH-së

4 Tetor 2016 - 09:53      

[E plotësuar] Kandidatëve të pakënaqur me ndarjen e specializimeve në fushën e mjekësisë, të cilët kanë bllokuar hyrjen zyrtare në Ministrinë e Shëndetësisë, policia po u kërkon që ta lirojnë, raporton KTV nga vendi i ngjarjes.

Kërkojnë anulimin e konkursit për specializim - bllokojnë me karrige hyrjen e MSH-së

Disa nga kandidatët e pakënaqur me ndarjen e specializimeve të fundit nga Ministria e Shëndetësisë, janë duke protestuar para objektit të këtij institucioni.

Siç raporton KTV, ata kanë kërkuar që të anulohet konkursi i fundit për ndarjen e specializimeve për shkak të, siç kanë thënë ata, “keqpërdorimeve me këto specializime të cilat iu dhanë të afërmve të profesorëve”.

Ata kanë kërkuar gjithashtu edhe shpërbërjen e komisionit që bëri ndarjen e këtyre specializimeve, pasi që thonë se “në këtë konkurs u pranuan fëmijë dhe të afërm të anëtarëve të komisionit”.

Protestuesit kanë bllokuar hyrjen e Ministrisë me karrige dhe nuk po lejojnë hyrjen e zyrtarëve dhe personave të tjerë. 

© KOHA. Të gjitha të drejtat janë të rezervuara.