Verzivolli në krye të Komitetit Ad Hoc për të Drejtat e Fëmijëve të Këshillit të Evropës

4 Tetor 2016 - 09:49      

Tiranë, 4 tetor - Kryetarja e Agjencisë Shtetërore për Mbrojtjen e të Drejtave të Fëmijëve, Ina Verzivolli, pas zgjedhjes si kryetare e Komitetit Ad Hoc për të Drejtat e Fëmijëve të Këshillit të Europës, e cilëson këtë të fundit, si një hap pranë implementimit të axhendës europiane për fëmijët.

Në një prononcim për ATSH-në, Verzivolli tha se “zgjedhja në krye të Komitetit të të Drejtave të Fëmijëve është një mirënjohje jo vetëm për mua, por edhe për punën e bërë këto vitet e fundit për të avancuar agjendën e fëmijëve në Shqipëri”.

Ajo vuri në dukje se ky hap do të intesifikojë punën per implementimin në Shqipëri të agjendës europiane.

Ky Komitet u mblodh për herë të parë më 28 dhe 29 shtator, në Strazburg të Francës. Komiteti do të luajë një rol për të implementuar Strategjinë Europiane për të Drejtat e Fëmijëve si dhe për të udhëzuar shtetet anëtare të Këshilli të Europës mbi standardet më të mira në fushën e fëmijëve të prekur nga kriza e refugjatëve, të drejtave të fëmijëve në botën e internetit, mbi pjesëmarrjen e fëmijëve, si dhe mbrojtjen e fëmijëve nga të gjitha format e dhunës.

Gjithashtu, edhe në faqen zyrtare të ministrit të Mirëqenies Sociale, Blendi Klosi, theksohet se ky është një vlerësim dhe motiv për të punuar më shumë.