Italia për konsensus partiak për formimin e FAKU-t

3 Tetor 2016 - 15:45      

Ministri i Ministrisë për Forcën e Sigurisë së Kosovës (FSK), Haki Demolli priti në takim ambasadorin e Republikës së Italisë në Republikën e Kosovës, Piero Cristoforo Sardi, i shoqëruar nga atasheu i Mbrojtjes i akredituar për Kosovë, kolonel Franco Galletti.

Në një njoftim për media thuhet se në takimin e përbashkët të ministrit Demolli dhe ambasadorit Sardi, u bisedua për marrëdhëniet e shkëlqyera ndërmjet Republikës së Kosovës dhe asaj të Italisë, për fushat e bashkëpunimit, për identifikimin dhe konkretizimin e aktiviteteve si dhe vazhdimin e bashkëpunimit edhe në të ardhmen.

Demolli, duke i uruar ambasadorit italian detyrën e re, i shprehu edhe besimin se bashkëpunimi me ambasadën italiane do të vazhdojë dhe do të intensifikohet edhe më shumë në të ardhmen, dhe përmes saj edhe me shtetin, Qeverinë, Ministrinë e Mbrojtjes dhe Forcat e Armatosura të Italisë.

Ai tha se pret që shteti i Italisë të bëjë hapa përpara në drejtim të arritjes së marrëveshjes së bashkëpunimit në fushën e sigurisë ndërmjet dy vendeve, e gjithashtu edhe mbështetje për procesin e transformimit të FSK-së në Forca të Armatosura.
Ambasadori i Italisë, Sardi u shpreh se Italia vazhdon ta sheh Republikën e Kosovës si faktor stabiliteti në regjion dhe se është e interesuar që ta mbështes në rrugën e saj të zhvillimit.

Më tej, për sa i përket transformimit të FSK-së në Forca të Armatosura, ambasadori Piero Cristoforo Sardi, tha se: ,,transformimi duhet të jetë i përgatitur dhe i koordinuar’', duke përmendur këtu edhe nevojën e konsensusit të të gjitha partive politike në Kuvendin e Kosovës.

© KOHA. Të gjitha të drejtat janë të rezervuara.