Licencohen 26 farmacistë

30 Shtator 2016 - 14:32      

Prishtinë, 30 shtator - Në kuadër të bartjes së përgjegjësive dhe funksionalizimit të odave të profesionistëve shëndetësorë, ministri i Shëndetësisë, Imet Rrahmani dhe kryetari i Odës së Farmacistëve të Kosovës, Zehadin Gashi, nënshkruan edhe 26 licenca të farmacistëve kosovarë, në kuadër të ushtrimit të përgjegjësive të përbashkëta të MSH-së dhe odave të profesionistëve shëndetësorë për licencim.

Nënshkrimi i licencave krahas ministrit dhe kryetarit të Bordit për licencim të profesionistëve shëndetësorë edhe nga kryetari i Odës së Farmacistëve, tregon për hapa të rinj në implementimin e Ligjit për odat e profesionistëve shëndetësorë dhe reformës në shëndetësi, pjesë e së cilës është edhe bartja e kompetencave graduale nga MSh-ja te odat e profesionistëve të Kosovës.
Ministria e Shëndetësisë do të vazhdojë të përkrah në forma të ndryshme odat deri në pavarësimin e tyre të plotë, që synohet të arrihet deri në janar të vitit 2017.

Bartja e kompetencave nga MSh te odat ka filluar me vendim të ministrit të Shëndetësisë, Imet Rrahmani, nga 1 korriku i vitit 2016 dhe deri tash, në kompetenca të odave kanë kaluar çështjet etike, edukimi i vazhduar profesional, ndërsa licencimi do të vazhdojë të jetë deri në fund të vitit komptencë e përbashkët e MSh-së dhe odave.