Molliqaj: Të gjithë e dimë që marrëveshja për demarkacion është e padrejtë

29 Shtator 2016 - 21:14      

Padrejtësia në çështjen e demarkacionit sipas sekretarit të LVV-së, Dardan Molliqaj tashmë është kuptuar nga të gjithë ndonëse, sipas tij, një vit më herët kundërshtimet e subjektit të tij cilësoheshin si nacionaliste.

Ai në Rubikon të KTV-së ka thënë se edhe pse ka kaluar një vit, kjo marrëveshje ka qenë e padrejtë që në fillim të saj.

“Kjo marrëveshje që ka qenë deri tani ka qenë e padrejtë. Kur e kemi ngritur zërin si parti dhe si opozitë e bashkuar na kanë cilësuar si nacionalistë mirëpo tash pas një viti kemi ardhur në pikën kur të gjithë e dinë që një marrëveshje e tillë është gabim”, ka thënë Molliqaj.

Molliqaj ka përmendur hapat përmes të cilës do të zgjidhej çështja e demarkacionit me Malin e Zi, çështje kjo tashmë e lënë pezull për një vit.

“Me u rishikua marrëveshja, me i ruajt marrëdhëniet me Malin e Zi dhe duam të sigurojmë BE-në që kjo marrëveshje do zgjidhet dhe ata ta heqin këtë kusht si kusht për liberalizim të vizave”, ka thënë Molliqaj.

Në rast të plotësimit të këtyre hapave, Molliqaj ka thënë se subjekti i tij do të marrë pjesë në Kuvend të Kosovës.

Molliqaj ka theksuar se çantat me koktej molotovi të gjetura në magazinën e kësaj lëvizje janë të montuara, ndonëse nuk ishte lejuar brenda asnjë nga Lëvizja Vetëvendosje.

© KOHA. Të gjitha të drejtat janë të rezervuara.