Selimi e Haxhiu përplasen për Qeverinë e Përkohshme dhe gjendjen në veri

29 Shtator 2016 - 18:16      

Interpelanca për veriun ka degjeneruar në një debat të ashpër mes deputeti të PDK-së, Bekim Haxhiu dhe atij të Vetëvendosjes, Rexhep Selimi.

Ka qenë deputeti i PDK-së, që ka thënë se “në kohën kur në veri në vitin ’99 po bëhej spastrim ndaj shqiptarëve, vëllezërit e ministrit në Qeverinë e Përkohshme, (v.j. Rexhep Selimi, emrin e të cilit nuk e ka përmendur Haxhiu) kanë qenë duke u marrë me uzurpime në Klinë e Prishtinë”.

Ka reaguar Selimi, i cili nga foltorja e ka akuzuar se si pjesëtar i SHIK-ut ka penguar doktorët që të rikthehen në shtëpitë në veri.
“Nëse të duket më i mirë MUP-i serb se Ministria e Brendshme e pasluftës atëherë je në shërbim të Oliver Ivanoviqit”.

Këta dy deputetë kohë më parë ishin përleshur fizikisht në Kuvendin e Kosovës, ndërsa ndaj Rexhep Selimit, dhe të tjerëve nga Vetëvendosje ka një proces gjyqësor pas padisë që e ka ushtruar Haxhiu për sulm fizik.

© KOHA. Të gjitha të drejtat janë të rezervuara.