Nuk dihet si dhe ku janë shpenzuar 18 milionë euro [video]

28 Shtator 2016 - 19:07      

Janë së paku 18 milionë euro të buxhetit të shtetit, që për katër vjet nuk kanë pasqyrë se si janë shpenzuar, raporton KTV.

Financat e subjekteve politike tash e katër vjet janë të paaudituara, përfshirë edhe dy palë zgjedhje, ato lokale dhe qendrore.

Kjo për faktin se Komisioni për Mbikëqyrjen e financave publike i Kuvendit të Kosovës, për tri herë radhazi, ka dështuar të zgjedhë auditorët, kompetencë kjo që u bart nga KQZ-ja te Kuvendi i Kosovës, me ndryshimet e ligjit në 2013-ën.

Për shoqërinë civile kjo situatë po u konvenon partive politike që të vazhdojnë t’i mbajnë në mjegull shpenzimet financiare.

Sipas ligjit për financimin e subjekteve politike, raportet vjetore financiare dhe raportet e deklarimit financiar të fushatës, të cilat dorëzohen nga subjektet politike në KQZ, do të auditohen në përputhje me standardet e kontabilitetit të zbatueshme në Kosovë, nga auditorë të cilët do t’i përzgjedhë Kuvendi i Republikës së Kosovës, përmes Komisionit për Mbikëqyrjen e Financave Publike.

Subjektet politike duhet të publikojnë dhe të mbajnë të publikuar së paku një vit në faqet e tyre zyrtare Raportin Vjetor Financiar të vitit paraprak dhe Raportin e Deklarimit Financiar të Fushatës së zgjedhjeve paraprake dhe ta publikojnë versionin e tyre të shkurtuar në njërën nga gazetat ditore kombëtare.

© KOHA. Të gjitha të drejtat janë të rezervuara.