Gjilani mbledh kryetarët e 17 komunave, synon bashkëpunim rajonal europian

28 Shtator 2016 - 14:40      

Gjilan, 28 shtator –Në Gjilan ka nisur sot konferenca e kryetarëve të 17 komunave të mikrorajonit europian - nga Kosova, Serbia, Maqedonia e Bullgaria. Konferenca synon bashkëpunim rajonal europian. Sipas njoftimit nga Komuna e Gjilanit, atë e ka organizuar kryetar i saj, Lutfi Haziri.

Ai, në hapjen e saj konference tha se e ka marrë këtë nismë me qëllim të bashkëpunimit dhe angazhimit të përbashkët rajonal drejt synimit dhe përgatitjes për intergrime europiane.
“Dua të theksoj se kontribut në bashkorganizim ka dhënë edhe Ministria e Pushtetit Lokal dhe ajo e Integrimeve Europiane. Funksionalizimi i mikroregjionit tonë, përveç fushës së arsimit, shëndetësisë etj., do të ndikojë në përmirësimin edhe të infrastrukturës sonë rrugore dhe hapjen e pikave të reja kufitare për qarkullimin e njerëzve”, ka thënë Haziri.

Siç u shpreh ai, zhvillimi i cilësdo komunë të këtij mikroregjioni e gëzon secilën nga 17 komunat e Ballkanit Perëndimor.

“Ne jemi europianë të Ballkanit Perëndimor dhe si të tillë do të vazhdojmë bashkëpunimin tonë të sinqertë, në mënyrë që t’i arrijmë qëllimet tona konkrete. Zhvillimi i një komune të këtij mikroregjioni, e gëzon secilën nga 17 komunat e Ballkanit Perëndimor”, është shprehur kryetari i Gjilanit.

Konferenca po i vazhdon punimet, ndërkaq gjatë ditës do të dilet me konkluzionet të përbashkëta.