Prezantohen arsyet përse kërkohet largimi i Aganit nga udhëheqja e PD-së

27 Shtator 2016 - 23:39      

Fidan Mustafa, sekretar i Partisë së Drejtësisë, në Interaktiv të KTV-së ka shpalosur arsyet përse shumë degë të kësaj partie po kërkojnë largimin e Ferid Aganit nga udhëheqja.

Të mërkurën do të mbahet kuvendi i jashtëzakonshëm i partisë, në të cilin Mustafa thotë se kanë konfirmuar pjesëmarrjen 18 degë të PD-së.

“Fillimisht do të diskutohet për zhvillimet e fundit brendapërbrenda partisë. Pastaj do të vendoset a do të zgjidhet kryetari i ri i Partisë së Drejtësisë. Kjo kërkesë është fillimisht e kryetarëve të degëve dhe më pas është zgjeruar si në nivel qendror ashtu edhe në atë lokal. Veprimi vjen duke marrë parasysh vendimet për marrëveshjet e fundit të vendit, duke përfshirë demarkacionin me Malin e Zi. E dimë se PD është në koalicion me PDK ku është realizuar vetëm një e treta e partneritetit dhe nga aktakuza e ngritur ndaj liderit të PD-së, kemi humbur edhe dikasterin e shëndetësisë. Aq më keq që Ferid Agani ka vendosur që këtë dikaster t’ia lë zëvendësministrit Ferat Shala, duke mos marrë parasysh kërkesën e degëve të PD-së që ajo të udhëhiqet nga partia jonë”, ka thënë Mustafa në Interaktiv.

Mustafa po ashtu ka bërë të ditur se pas kuvendit të nesërm, do të diskutohet edhe nëse PD do të vazhdojë bashkëpunimin me PDK-në.

© KOHA. Të gjitha të drejtat janë të rezervuara.