MASHT premton ndihma për universitetet publike

27 Shtator 2016 - 16:16      

Në prag të fillimit të vitit të ri akademik 2016/2017, ministri i Arsimit, Shkencës dhe Teknologjisë, Arsim Bajrami, ka marrë pjesë në takimin e radhës së Konferencës së Rektorëve të Universiteteve Publike të Kosovës, njofton kumtesa ministrore, transmeton Koha.net.

Bajrami përgëzoi rektorët për organizimin, siç tha të mirë, të provimeve pranuese në universitetet publike, duke siguruar kështu kredibilitet të këtij procesi, ndërsa uroi për fillimin e vitit të ri akademik.

Ai iu premtoi rektorëve mbështetjen e plotë në segmentet ku Ministria mund të ndihmojë, ndërsa përmendi edhe procesin e akreditimit të programeve të studimeve dhe tha se edhe këtu janë vendosur disa standarde që po respektohen.

“Ministria e Arsimit është e interesuar që të orientojë programet drejt nevojave të tregut të punës, që të zhvillojmë me shumë përgjegjësi projektin e profilizimit të universiteteve tona dhe që me kohë secili universitet të krijojë identitetin e vet”.

Sa i përket financimit të universiteteve publike, Bajrami theksoi se është duke u diskutuar edhe skema e financimit. “Këtë skemë do ta bëjmë bashkë dhe do të lobojmë së bashku për buxhet më të madh në sferën e arsimin e lartë”.

© KOHA. Të gjitha të drejtat janë të rezervuara.