Posta e Kosovës po e cenon privatësinë e kontributdhënësve

27 Shtator 2016 - 12:37      

Kryesuesi i bordit të Trustit, Ymer Havolli, në emisionin “Ekonomia me Erëzën” të KTV-së, ka pranuar se ky institucion është duke shkelur privatësinë e kontribuuesve pensionalë.

Kjo ndodh në rastet kur bëhet shpërndarja e zarfeve me pasqyrat individuale të kontributdhënësve.

Nga postierët, ato lihen nëpër korridore ndërtesash banimi si dhe nëpër markete të fshatrave. Kjo shpërndarje nxit rrezikun që zarfet të hapen nga persona tjerë dhe të informohen për gjendjen e paguesit e kontributeve, përfshirë edhe vlerën e pagës.

Havolli për këtë ka fajësuar ndërmarrjen publike “Posta e Kosovës”.

“Jemi në dijeni për këtë. Është keq, por nuk është faji ynë”, ka pohuar Havolli.

Ka shtuar se institucioni që drejton ka bërë disa herë ankesa drejtuar kësaj ndërmarrje publike. Posta e Kosovës, sipas tij, asnjëherë nuk është përmirësuar në këtë drejtim.

“Ne (v.j Trusti) kemi dashur që ta bëjmë shpërndarjen vetë, që t’ia dorëzojmë secilit në duar pasqyrat financiare. Por, nuk na lejon ligji që të merremi edhe me shpërndarje”, ka theksuar Havolli. 

© KOHA. Të gjitha të drejtat janë të rezervuara.