Ministri Jevtiq i ankohet ndërkombëtarëve për refuzimin që Kosova i bëri Gjuriqit

25 Shtator 2016 - 15:25      

Ministri për Komunitete dhe Kthim në Qeverinë e Kosovës, Dalibor Jevtiq ka thënë se ka biseduar me përfaqësuesit ndërkombëtarë lidhur me kthimin e Marko Gjuriqit nga Kosova dhe moslejimin e tij për të hyrë në Pejë.

Jevtiq, në një intervistë për mediat serbe, potencon se ndërkombëtarët nuk kanë parë arsye të forta që Policia e Kosovës të vepronte në këtë mënyrë.

Për më tepër, sipas tij, Policia e Kosovës ka pasur urdhër politik, përkundër faktit se qëllimi mes Prishtinës dhe Beogradit është normalizimi i marrëdhënieve mes tyre.

“Nuk është mirë kur dikush që tenton të përulë në këtë mënyrë një përfaqësues të Republikës së Serbisë. Ky është mesazh jo i mirë”, thotë Jevtiq.

Ministri serb konsideron se deklaratat e Edita Tahirit janë vetëm justifikime para dialogut, pasi që sipas tij, Tahiri ka presion të madh. Kjo, për shkak të kundërshtimit që i është bërë asaj për temat që po diskutohen në Bruksel.

Ndërsa nuk sheh arsye të forta, që opozita kosovare të kyçet në procesin e dialogut në Bruksel, çështje kjo, e ngritur nga përfaqësuesja e BE-së në Kosovë, Nataliya Apostolova.

© KOHA