Shqipëria e fundit në rajon për inovacion, Kosova s’përmendet fare

25 Shtator 2016 - 11:45      

Në listën e vendeve me inovacion më të zhvilluar në botë, projekti i Organizatës Botërore të Pronësisë Intelektuale, Universitetit Cornell dhe shkollës së biznesit “Insead”, Sllovenia është radhitur në nivel më të lartë në rajon.

Pas Sllovenisë, e cila këtë vit mori pozicionin e lartë, 32, është Kroacia në pozitën e 47, Mali i Zi në të 51-ën, Maqedonia në 58-ën, Serbia në 65-ën, Bosnja e Hercegovina në 87-ën, si dhe Shqipëria në pozitën 92, transmeton Koha.net. Siç mund të kuptojmë, Kosova nuk gjendet fare në këtë listë të vendeve me inovacion më të zhvilluar, madje s’figuron as në hartën e përpiluar nga institucionet e sipërpërmendura.

Në mesin e 128 vendeve në Indeksin Global të Inovacionit të këtij viti, dominojnë dukshëm vendet e Evropës, ku e para është Zvicra, e dyta Suedia dhe e treta Britania e Madhe.

Në formimin e kësaj liste janë marrë parasysh disa fusha, të tilla si zhvillimi i infrastrukturës, stabiliteti i institucioneve, sofistikimi i tregut dhe bizneseve, prodhimet kreative dhe hulumtimet.

© KOHA