Azem Syla frikësoi dëshmitarin e mbrojtur përmes një personi të tretë [video]

24 Shtator 2016 - 19:02      

Azem Syla nuk ka shkuar vetë ta frikësojë dëshmitarin e mbrojtur, i njohur si “Dëshmitari 2”.

Këtë e ka bërë nëpërmjet një personi të tretë, dhe kjo praktikë, sipas Prokurorisë, është tipike për një udhëheqës të një grupi të organizuar kriminal: asnjëherë nuk veprojnë personalisht, raporton KTV.

“Kështu, Azem Syla e ka shkelur urdhrin e Gjykatës Themelore, kur përmes një personi të tretë, i është afruar dhe është munduar të ndikojë në Dëshmitarin 2. Kjo është një rrethanë, e cila jep indikacion se ai do të pengojë procedurën duke ndikuar në dëshmitarë”, thuhet ndër të tjera në aktvendimin e Gjykatës së Apelit, të siguruar nga KTV-ja.

Sipas Prokurorisë, ato që janë cilësuar si tentime për frikësim dëshmitarësh, kanë ndodhur në tri raste të ndara, i pari madje në janar të këtij viti.

Megjithatë, avokati i Sylës, Tomë Gashi, e quan të pakuptimtë vendimin e Apelit, sipas tij, diametralisht të kundërt me atë të themelores, pasi që rrethanat, nuk kanë ndryshuar.

Megjithatë, Syla nuk është në qeli, por për arsye shëndetësore, është shtrirë në QKUK. 

© KOHA. Të gjitha të drejtat janë të rezervuara.