Punishte për prodhimin dhe montimin e karrocave për personat me aftësi të kufizuara

23 Shtator 2016 - 15:47      

Prishtinë, 23 shtator - Ministria e Shëndetësisë, Ministria e Punës dhe Mirëqenies Sociale dhe “Handikos” nënshkruan Marrëveshje Bashkëpunimi, e cila ngërthen mbështetjen e të dy ministrive për hapjen e punishtes për prodhimin dhe montimin e karrocave për personat me aftësi të kufizuara.

Ministri i Punës dhe Mirëqenies Sociale, Arban Abrashi, me këtë rast tha se realizimi i këtij projekti është rezultat i njerëzve të mirë, i cili është i pamatshëm me vlerë monetare. Ndërsa zëvendësministri i Shëndetësisë, Izet Sadiku, u shpreh se “ky është një prej projekteve më të qëlluara. Punishtja për prodhimin dhe montimin e karrocave i ndihmon vetë personat me aftësi të kufizuara të vendit tonë të ndjehen kontribut-dhënës dhe të barabartë në mesin e shoqërisë”.

Drejtori i “Handikosit”, z. Afrim Maliqi tha se “me Marrëveshjen e nënshkruar në mes MSh, MPMS dhe “Handikos”, qëndrueshmëria e punishtes është në duart e institucioneve tona, e cila si ide ka lindur qysh para dy viteve si nevojë për përmbushjen e nevojave të fëmijëve tanë, duke bërë të mundshme sigurimin e karrocave të përshtatshme për ta”.

Ai ka falënderuar z. Wayne Hadson (Fabrika e karrocave -ROC Wheels) dhe z. Steve Doty “DirectConnect” nga SHBA, për mbështetjen që kanë dhënë në realizimin e këtij projekti.
Ata kanë shprehur kënaqësinë e tyre për mundësinë që kanë pasur në ofrimin e ndihmës për të realizuar këtë projekt.

Kjo marrëveshje, bashkë-financohet nga MSH dhe MPMS, ndërsa implementohet nga OJQ “ HANDIKOS”. Realizimi i këtij projekti, do të bëhet në Komunën e Prishtinës, ndërsa përfitues do të jenë fëmijët dhe të rriturit me aftësi të kufizuara, nga e gjithë Kosova. Projekti përfshin hapjen e punëtorisë së parë në Kosovë për prodhimin, montimin dhe riparimin e karrocave në bazë të specifikave dhe të nevojave të përdoruesve të karrocave, të cilat do kryhen për periudhën kohore të zbatimit nga 15.09.2016 deri me 31.12.2016.