Projekti “Më mëso mua” nis në Shkollën Model të Prishtinës

23 Shtator 2016 - 14:17      

Prishtinë, 23 shtator - Ministri i Arsimit Shkencës dhe Teknologjisë, z. Arsim Bajrami, i shoqëruar nga kryetari i Komisionit Parlamentar për Arsim, z. Nait Hasani, dhe drejtoren për Arsim në Komunën e Prishtinës, znj. Arbërie Nagavci, vizitoi sot Shkollën Model në Prishtinë, për të parë nga afër pilotimin e projektit “School Me” (Më mëso mua).

Ministri Bajrami me këtë rast ka vlerësuar se ky projekt, i cili po fillon për herë të parë në Kosovë, ka për qëllim standardizimit e mesimdhënies në nivel vendi.

Ministri Bajrami theksoi se, ofrimi i një platforme digjitale e cila përfshin të gjitha njësitë mësimore në bazë të Kurrikulës së Kosovës është një mundësi shumë e mirë për mësimdhënësit që të zhvillojë një orë cilësore dhe proaktive.

“E pamë që ora ishte shumë tërheqëse për nxënësit. Nxënësit i mësonin gjërat në mënyrë logjike dhe ishin në gjendje të shprehnin mendimin, që është shumë me rëndësi. Uroj që ky projekt të pranohet nga të gjithë mësimdhënësit sepse jam i sigurt se do të rezultojë me ngritje të cilësisë dhe do të mundësojë që krahas vlerësimit unik të kemi edhe një standard unik të të mësimdhënies sepse një mësimdhënie aktive siguron ngritje të cilësisë në sistemin arsimor”, theksoi ministri Bajrami.

Ministri Bajrami, po ashtu bëri të ditur se platforma digjitale e mësimdhënies është duke u pilotuar në disa shkolla të Republikës së Kosovës dhe se pas vlerësimit do të merret vendimi për ta shtrirë në nivel kombëtarë, në mënyrë që të standardizohet mësimdhënia, me mësimdhënës të përkushtuar dhe me nxënës të motivuar

Projekti “School Me” financohet nga Fondacioni Kosovar për Shoqëri të Hapur dhe ka për qëllim të mbështesë arsimin e nxënësve shqipfolës të shkollave 9-vjeçare në Shqipëri, Kosovë, Maqedoni, Serbi, Malin e Zi, si dhe të fëmijëve shqiptarë në shtete të tjera.