Qeveria ka dështuar në procesin e fiskalizimit [video]

21 Shtator 2016 - 19:13      

Nuk kanë më arsye t’u ikin taksave. Që nga viti 2010, kur ka filluar Procesi i Fiskalizimit në Kosovë, vetëm 40 kompani të naftës nga 600 sa janë gjithsej, janë fiskalizuar, raporton KTV.

Të tjerat, që kanë operuar pa arka fiskale deri tash, do të paguajnë më pak për t’u pajisur me arka fiskale.
Shoqata e Kompanive të Arkave Fiskale, ka zbritur çmimin pas ankesave të shumta të naftëtarëve. Zëdhënësi i kësaj shoqate, Kestrin Kumnova, ka thënë se kompanitë e licencuara edhe pse kanë bërë investime për t’i dalë ballë këtij procesi kanë qenë të detyruara të presin.

Kurse kreu i Odës Ekonomike të vendit, Safet Gërxhaliu, ka thënë se Qeveria e Kosovës, ka dështuar në procesin e fiskalizimit.
Përfaqësuesit e Shoqatës së Kompanive të Arkave Fiskale po ashtu kanë shpalosur mundësitë e reja për të përfunduar procesin e fiskalizimit të naftëtarëve dhe bizneseve tjera.

Deri më tani naftëtarët kanë kundërshtuar fiskalizimin, siç kanë thënë ata për shkak të monopolit dhe çmimeve të larta të pajisjeve fiskale.

© KOHA. Të gjitha të drejtat janë të rezervuara.