“Nisma nuk është kundër agjendës evropiane të Kosovës”

20 Shtator 2016 - 19:55      

Kryetari i Këshillit Kombëtar të NISMA për Kosovën, Jakup Krasniqi, bashkë me sekretarin për Marrëdhënie me Jashtë të Nismas, Skënder Reçica, kanë pritur sot shefen e Zyrës së BE-së/Përfaqësuesen e Posaçme të BE-së në Kosovë, Nataliya Apostolova, njofton kumtesa partiake, transmeton Koha.net.

Kryetari i Këshillit Kombëtar të NISMA për Kosovën, Jakup Krasniqi, Shefes së Zyrës së BE-së/PPBE në Kosovë, Nataliya Apostolova, i ka uruar suksese në detyrën e re.

Shefja e Zyrës së BE-së/PPBE në Kosovë, Nataliya Apostolova, ka thënë se Bashkimi Europian është i përkushtuar maksimalisht për të mbështetur perspektivën europiane të Kosovës.
“Duhet të punojmë së bashku në avancimin e agjendës së BE-së për Kosovën, në çështjet si zbatimi i MSA-së, liberalizimin e vizave, dhe vazhdimin e dialogut për normalizimin e marrëdhënieve mes Prishtinës e Beogradit. Kuvendi dhe opozita kanë një rol të fuqishëm dhe korrektues në këto procese”, ka thënë Apostolova.

Jakup Krasniqi, ka folur edhe për çështjen e liberalizimit të vizave, për të cilën tha se liberalizimin e vizave e meritojnë qytetarët e Kosovës. Nisma nuk është kundër agjendës europiane të Kosovës, por” ne mendojmë se institucionet tona nuk janë treguar transparente, ato nuk kanë bashkëpunuar me opozitën, por as nuk e kanë informuar sa duhet qytetarin për zhvillimet e agjendës europiane të Kosovës”.

Në fund të takimit, të dy bashkëbiseduesit, Krasniqi dhe Apostolova, u dakorduan për thellimin e bashkëpunimit dhe komunikimit.

© KOHA. Të gjitha të drejtat janë të rezervuara.