Efikasiteti i KOSTT-it varet nga stabiliteti energjetik

20 Shtator 2016 - 16:47      

Anëtarë të Komisionit për zhvillim ekonomik, Infrastrukturë, Tregti dhe Industri të prirë nga kryetari Muhamet Mustafa, vizituan sot ndërmarrjen publike “Operatorin e Sistemit të Transmisionit dhe Tregut” KOSTT), njofton kumtesa, transmeton Koha.net.

Ata u pritën nga Drita Kongjeli, kryesuese e Bordit si dhe Mustafë Hasani, kryesues i Bordit ekzekutiv me bashkëpunëtorët e tij.

Kongjeli i falënderoi anëtarët e Komisionit për vizitën dhe i njoftoi ata se kjo ndërmarrje është ndër më të suksesshmet në vend.

Më pas, kryesuesi i Bordit ekzekutiv Hasani, prezantoi aktivitet dhe gjendjes në të cilën gjendet kjo ndërmarrje.

“Funksioni kryesor i ndërmarrjes është operimi, mirëmbajtja dhe zhvillimi i sistemit të transmisionit” tha Hasani. Ndër zhvillimet dhe aktivitetet me rëndësi ai përmendi ndërtimin e linjës interkonektive me Shqipërinë, ngritjen e vazhdueshme të kapaciteteve transmetuese dhe investimet në rrjetin e transmisionit, bashkëpunimin e ngushtë rajonal edhe me vendet e tjera eurokontinentale.

Si sfidë, ndërkaq, ai përmendi anëtarësimin në mekanizmat ndërkombëtar të operatorëve të sistemit të transmisionit dhe funksionimin si transmetues i pavarur.

Kryetari i Komisionit Muhamet Mustafa, falënderoi përfaqësuesit e KOSTT-it për pritjen, duke shtuar se kjo ndërmarrje është mjaft e rëndësishme, duke nënvizuar se nga efikasiteti i saj varet edhe stabiliteti energjetik në vend dhe kostoja e energjisë elektrike.

Ai po ashtu i inkurajoi ata për fuqizimin e qeverisjes së ndërmarrjes, realizimin e projekteve mbi bazën e studimeve, angazhimet për anëtarësim në mekanizmat rajonal e ndërkombëtar. 

© KOHA. Të gjitha të drejtat janë të rezervuara.