BE-ja kërkon sundim të ligjit dhe luftë kundër korrupsionit si thelbësore për implementim të MSA-së

20 Shtator 2016 - 06:30      

Sundim të ligjit, luftë kundër korrupsionit dhe krimit të organizuar, fuqizim të organeve antikorrupsion, largim të zyrtarëve politikë kundër të cilëve ka aktakuza, konfiskim të pasurisë së fituar në mënyrë të paligjshme dhe emërime në mënyrë transparente të anëtarëve të bordeve të ndërmarrjeve publike, janë disa nga kërkesat që ka bërë shefja e re e Zyrës së Bashkimit Evropian në Kosovë”, Nataliya Apostolova.

Sipas saj, implementimi i të gjitha këtyre veprimeve do të kontribuonte në zbatimin e Marrëveshjes së Stabilizim-Asociimit (MSA), e nënshkruar në mes të Kosovës dhe BE-së në tetor të vitit të kaluar dhe ka hyrë në fuqi më një prill të këtij viti, shkruan sot Koha Ditore.

Apostolova në diskutimin “Progresi në zbatimin e MSA-së: Sfidat në agjendën evropiane dhe reformat në sundimin e ligjit”, që është organizuar të hënën nga Komisioni parlamentar për Integrime Evropiane dhe Grupi për Studime Juridike dhe Politike, ka thënë se MSA-ja e qartëson të ardhmen evropiane të Kosovës dhe se është e rëndësishme edhe politikisht, edhe ekonomikisht për Kosovën.

© KOHA. Të gjitha të drejtat janë të rezervuara.