Qeveria ende s’e ka gati ligjin për Trepçën, merr akuzë nga opozita [video]

18 Shtator 2016 - 20:20      

Ligji dhe strategjia për kombinatin “Trepça” ende nuk janë bërë gati nga qeveria.

Me këtë rrezikohet që ky gjigant të shkojë në likuidim.

Megjithëse Komisioni Qeveritar u formua në muajin prill për hartimin e këtij draft-ligji, ende nuk ka arritur që të bëjë gati këtë dokument për ta proceduar më pas në Komisionin për Zhvillim Ekonomik në Kuvend, raporton KTV.

Anëtari i këtij Komisioni nga radhët e AAK-së, Pal Lekaj, thotë se qeveria, me qëllim të përfitimeve personale, po e vonon përgatitjen e këtij projektligji.

Ndërkaq, Enver Hoti nga Nisma për Kosovën e quan shumë të vonshëm këtë projektligj sepse, sipas tij, gjasat janë të mëdha që “Trepça” të shkojë në likuidim.

Por krejt ndryshe mendon kryetari i këtij komisioni, i cili vjen nga partia në pushtet, Lidhja Demokratike e Kosovës, Muhamet Mustafa.

Nuk jep datë se kur ligji do të shkojë në Kuvend, por konfirmon se është duke u punuar në këtë drejtim.

Kohavisioni ka kërkuar në Ministrinë e Zhvillimit detaje se deri ku ka shkuar procesi i përgatitjes së strategjisë dhe projektligjit për “Trepçën” por nuk ka arritur të marrë përgjigje.

© KOHA. Të gjitha të drejtat janë të rezervuara.