Për Lutfi e Alban Dërvishin lëshohet urdhërarrest ndërkombëtar [video]

18 Shtator 2016 - 19:03      

Që nga korriku i këtij viti, babë e bir, Lutfi e Arban Dervishi, janë duke u kërkuar ndërkombëtarisht.

Dy të dënuarit me 8 vjet burgim për krim të organizuar, trafikim me njerëz dhe transplantim ilegal të veshkave, që nga shpallja e aktgjykimit, gjenden në arrati.

Gjykata Themelore në Prishtinë ka lëshuar urdhër-arrest ndërkombëtar për të zbatuar në këtë mënyrë vendimin e Gjykatës së Apelit. Kreu i kësaj Gjykate, Hamdi Ibrahimi, përveç se ka konfirmuar lëshimin e këtij urdhër-arresti nuk ka dashur të japë asnjë koment lidhur me rastin.

Ndërsa zëdhënësi i Policisë së Kosovës, Daut Hoxha, ka konfirmuar se Lutfi e Arban Dervishi që nga muaji korrik i këtij viti, janë në kërkim ndërkombëtar. KTV-ja ka kontaktuar edhe me avokatin e Arban Dervishit, Petrit Dushin i cili ka thënë se nuk është në dijeni për këtë urdhër-arrest.

Dushi gjithashtu ka thënë se ka muaj të tërë që nuk ka pasur asnjë kontakt me klientin e tij.

KTV-ja në mars të këtij viti kishte raportuar se as Lutfi Dervishi dhe as i djali i tij Arban Dervishi nuk ishin paraqitur për të vuajtur dënimin prej 8 vjetësh burgim. Për më tepër, Arban Dervishi, përmes avokatit të tij, kishte konfirmuar se ai ishte larguar për çështje të biznesit jashtë Kosovës.

© KOHA. Të gjitha të drejtat janë të rezervuara.