Lirohet Azem Syla - vetëm paraqitje në Polici një herë në javë

17 Shtator 2016 - 19:22      

Gjyqtarja e procedurës paraprake Jennifer Seal, ka vendosur ta refuzojë kërkesën e prokurorit të EULEX-it për caktimin e paraburgimin ndaj ish-deputetit të PDK-së, Azem Syla dhe ka marrë vendim që ta lirojë atë menjëherë.

Ndaj tij ka mbetur në fuqi masa që ishte dhënë më herët që të lajmërohet një herë një javë në polici.

Një gjë të tillë e ka konfirmuar për KTV-në, avokati i Azems Syles, Tomë Gashi.

“Me këtë është vërtetuar se nuk ka ndikuar në dëshmitar dhe as që e ka dërguar dikë që në emër të tij apo në mënyrë direkte apo indirekte të flas me dëshmitarin e mbrojtur”, ka thënë Gashi, raporton KTV.

Ky vendim u morr një ditë pasi që Syla u arrestua sërish me kërkesë të prokurorit të EULEX-it, pasi dyshimeve se ka pasur tentim për të ushtruar ndikim tek njëri prej dëshmitarëve të mbrojtur.

Azem Syla, bashkë me 51 persona të tjerë, dyshohet për veprat penale: krim i organizuar, shpëlarje parash, keqpërdorim i pozitës zyrtare, nxjerrje e kundërligjshme e vendimeve gjyqësore dhe dhënie e marrje ryshfeti.

Sipas Prokurorisë, Azem Syla dhe Shpresim Uka, ishin udhëheqës dhe financues të këtij grupi kriminal që nga viti 2006.

© KOHA. Të gjitha të drejtat janë të rezervuara.