Pas strehës për drogë e prostitucion, Xhamia e Çarshisë bëhet edhe deponi bërlloku [foto]

16 Shtator 2016 - 22:00      

Xhamia më e vjetër e Prishtinës, ajo e Çarshisë, që njihet edhe si Xhamia e Gurit po vazhdon të neglizhohet.

Gjendja e saj vazhdon të jetë për gjynah. E kësaj radhe ka qenë profesori në Fakultetin e Studimeve Islame, Xhabir Hamiti, që ka alarmuar për situatën. Ai ka shkrepur dy fotografi në të cilën shihet bërlloku që ka mbuluar hapësirën përreth monumentit gjashtë shekullor që shteti e mbron me ligj.

Vetëm pak kohë më parë, në fund të muajit gusht Koha kishte raportuar se si ky monument i vjetër, restaurimi i të cilit ka ngelur në gjysmë, është kthyer në strehë për narkomanët e për zhvillimin e prostitucionit.

Kësisoj ajo është bërë çerdhe e së keqes. Qysh kur nisi restaurimi i saj në 2011 me qëllimin për të ruajtur gjurmët e kohës, ajo ka mbetur pa përkujdesje dhe bazuar në atë që thotë Bashkësia Islame, xhamia po shfrytëzohet për prostitucion dhe narkomani, raportonte KTV më 24 gusht të këtij viti.

Këtë shqetësim e kishte ngritur përfaqësuesi i imamëve të Prishtinës, Idriz Gjigolli, në takimin që po diskutohej për sigurinë në vend, i cili ka kërkuar nga ministri i Punëve të Brendshme, Skënder Hyseni, që ta zgjidhë këtë problem.

Pretendimet e Gjigollit i ka vërtetuar edhe u.d. i komandanti i Policisë së Kosovës për rajonin e Prishtinës, Rexhep Sijarina, i cili ka pranuar se kanë marrë telefonata dhe se aty kanë hasur në raste te narkomanëve dhe prostitucionit.

© KOHA. Të gjitha të drejtat janë të rezervuara.