Këpucët e “Solidit” do të mbathin rumunë e serbë

16 Shtator 2016 - 14:54      

Suharekë, 16 shtator - Fabrika e këpucëve ‘Solid’ në Suharekë ka nisur eksportin e par‰ë të këpucëve për në Rumani dhe Serbi me sukses edhe përkundër se këto dy shtete ende nuk e kanë pranuar Kosovën.

Në nisjen e eksporteve kanë marr pjesë edhe një delegacion i Aleancës Kosovare të Bizneseve i udhëhequr nga kryetari Agim Shahini, transmeton Koha.net.

Agim Shahini, kryetar i Aleancës Kosovare të Bizneseve, tha se eksporti i prodhimeve “Made in Kosova” për në Rumani dhe Serbi, shtete këto që nuk e kanë njohur Kosovën, ka rëndësi të madhe. Sipas tij kjo po bëhet falë diplomacisë ekonomike të Aleancës Kosovare të Bizneseve dhe Ministrisë së Punëve të Jashtme.

“Edhe pse vështirësitë për qarkullim në këto dy shtete janë evidente, bizneset e tyre po i vlerësojnë lart prodhimet e Kosovës”, tha Agim Shahini.

Ai tregoi se AKB-ja në vitin 2012 e këtej kanë lobuar fuqishëm në Rumani, që prodhimet e Kosovës të eksportohen atje. Kjo është një rezultat dhe e arritur për të gjithë Kosovën.

“Prodhimi cilësor ka gjetur ato tregje dhe kjo është një rezultat i fuqishëm që produktet e Kosovës të depërtojnë atje ku as institucionet e shtetit e shpesh herë as qytetarët nuk arritur të depërtojnë”, tha Agimi Shahini.

Kryetari i Aleancës Kosovare të Bizneseve, tha se institucionet tona duhet ta ndërrojnë mentalitetin për avancimin e prodhuesve vendës, në atë mënyrë që të marrin tregje të huaja dhe të rritet fuqia konkurruese.

Rumania dhe Serbia, janë rreth tridhjetë milionë konsumatorë dhe tregje tepër interesante për prodhimet e Kosovës, por vështirësitë e prodhuesve vendës për të qenë më konkurrent në vend, po i pengojnë këta që të marrin tregje të reja.

Ai tregoi se prodhuesit po përballen me vështirësi të shumta dhe që institucionet e kanë për obligim që të krijojnë klimë më të favorshme për prodhuesit vendës e të cilët janë ardhmëria e vendit.

Ahmet Kuqi, nga fabrika e këpucëve ‘Solid’ tha se po nisin eksportin e mbi dy mijë palë këpucësh për në Rumani dhe mbi një mijë palë të tjera për në Serbi. Eksporti po bëhet në dy shtete të cilat ende nuk na kanë pranuar dhe është një shembull shumë i mirë që këpucët tona të depërtojnë në vende që ende nuk na kanë njohur.

“Eksporti po realizohet me mbishkrimin apo deklaracionin “Made in Kosova”. Për në Rumani po eksportojmë për herë të parë, ndërsa në Serbi po vazhdojmë eksportet tash tre vjet me radhë dhe pa asnjë problem do të vazhdojë eksporti “, tha Kuqi.  

© KOHA. Të gjitha të drejtat janë të rezervuara.