“Kosova gazetarët rusë të arrestuar i deporton në Serbi”

16 Shtator 2016 - 11:04      

Gazeta e Beogradit Veçernje Novosti njofton sot se Kosova ka arrestuar gazetarë rusë të “News front”, transmeton Koha.net.

Të arrestuarit, sipas kësaj gazete, janë Oksana Sazonova dhe Sergej Belous.

Ata janë arrestuar mbrëmë rreth orës 19.00.
Informatën për arrestimin e ka pohuar në facebook udhëheqësi i „News frontit“ Konstantin Knirik.

Sipas tij, “vala informative” i ka detyruar autoritetet e Kosovës të marrin vendim që gazetarët rusë të deportohen në Serbi, ku, ka thënë ai, “do të jenë më mirë.”

Oksana Sazonova dhe Sergej Belous kanë qëndruar në Kosovë për të organizuar vizitën e fëmijëve serbë të Kosovës në Rusi. Ata, krahas kësaj, kanë, xhiruar edhe manastiret ortodokse për një film dokumentar për Kosovën, sqaron gazeta e Beogradit.

„Gazetarët janë akuzuar për qëndrim ilegal në Kosovë dhe atyre u janë konfiskuar pajiset fotografike. Nuk u është lejuar kontakti me personat e afërt e as me përfaqësuesit diplomatikë rusë në Serbi”, ka shkruar në FB Knirik.

Polica e Kosovës për portalin Koha.net, nuk e pohoi dhe as nuk e mohoi këtë lajm.
Rusia nuk e njeh pavarësinë Kosovës dhe as pasaportën e saj.
Serbia dhe Rusia nuk aplikojnë viza për udhëtimet e qytetarëve të tyre në këto dy vende.

© KOHA. Të gjitha të drejtat janë të rezervuara.