Pas miratimit të rregullores nga KPM-ja, KTV-ja rikthehet në kanalin me numër 6 [video]

15 Shtator 2016 - 19:24      

Ka ndryshuar renditja në katalogun e kanaleve të rrjetit kabllor IPKO, pas miratimit nga Komisioni i Pavarur i Mediave të Rregullores së re për Shpërndarjen e Ofruesve të Shërbimeve Mediale Audio dhe Audiovizuale.

Sipas listimit të ri, Kohavisioni është renditur në kanalin numër 6, nga kanali 83 ku kishte qenë në tri vitet e fundit.

Drejtuesi i Marrëdhënieve me Publikun në IPKO, Alban Kastrati, ka thënë se listimi i ri është një ndryshim cilësor por jo rrënjësor, duke mos u bërë ndryshime të mëdha.

Sipas Kastratit, pavarësisht strukturës së re të listës së kanaleve, çdo shikues do të mund t’i rendis kanalet sipas preferencave të tij.

Ky fleksibilitet, që u mundëson shikuesve ta strukturojnë në mënyrë të pavarur listën e kanaleve në shtëpitë e tyre, është parë si një përparësi.

Ndërkohë që kreu i Komisionit të Pavarur për Media, Adnan Merovci, ka thënë se KPM-ja se si në çdo vend tjetër, përmes rregullores nuk e ka marrë përsipër përcaktimin e renditjes së kanaleve, përveç atyre të transmetuesit publik.

Sipas rregullores së re të KPM-së, 26 televizionet nacionale dhe lokale që janë listuar për bartje të obligueshme, nuk prejudikon renditjen e tyre në operatorin e shpërndarjes.

© KOHA. Të gjitha të drejtat janë të rezervuara.