Ahmeti: Janë ndërprerë punime në kishën ortodokse

15 Shtator 2016 - 14:00      

Kryetari i Prishtinës Shpend Ahmeti, përmes Facebookut ka njoftuar se Komuna e Prishtinës ka ndërprerë punimet në kishën serbe te kampusi universitar dhe ka kërkuar nga personat e përfshirë të sjellin dokumentacionin zyrtar rreth këtyre punëve në drejtorinë e Inspeksionit sot, transmeton Koha.net.

Në ndërkohë, burimet e KTV-së bëjnë me dije se ata që punonin pa leje përkatëse janë larguar nga ky vendpunim.

Ahmeti lidhur me këto zhvillime ka shkruar në Facebook:

“Drejtoria e Inspeksionit e Komunës se Prishtinës sot ka dal në vendin e ngjarjes te Kisha Ortodokse në kampusin e Universitetit të Prishtinës pas shumë raportimeve se atje po punohet.

Drejtoria e Inspeksionit ka vërejtur disa persona duke punuar në pastrimin e objektit të cilët kanë refuzuar të legjitimohen. Është vërejtur se në emër të pastrimit është bërë gëlqerosje e disa mureve ku kanë qenë të shkruara parulla të ndryshme.

Komuna e Prishtinës ka ndërprerë këtë aktivitet dhe ka kërkuar nga personat e përfshirë që të sjellin gjithë dokumentacionin zyrtar rreth këtyre punëve në drejtorinë e inspeksionit sot.
Po ashtu kemi kërkuar në qoftë se ka ndonjë letër apo leje pune nga qeveria e Republikës së Kosovës.

Komuna e Prishtinës nuk posedon asnjë dokumentacion rreth kësaj ndërtese. Qe më shumë se një vit kemi bërë thirrje tek të gjitha palët të sjellin dokumentacionin relevant, por kemi hasur në mospërfillje. Ne do ta zbatojmë ligjin sa i përket kompetencave të komunës dhe i ftojmë të gjitha palët dhe të gjitha institucionet që të funksionojnë në përputhje me Ligjin për Ndërtimin”. 

© KOHA. Të gjitha të drejtat janë të rezervuara.