Serbia nuk tregon nëse ka leje të Kosovës për Luginën e Diellit, vazhdon ndërtimin [video]

14 Shtator 2016 - 19:07      

Qeveria e Serbisë thotë se posedon gjithë dokumentacionin e nevojshëm për rreth 300 shtëpitë e serbëve, të cilat pritet të ndërtohen në Lagjen “Lugina e Diellit” në veri të Mitrovicës, derisa nuk ka dashur të përgjigjet nëse ka kërkuar leje nga institucionet e Kosovës, raporton KTV.

Zyra për Kosovën në Qeverinë Serbe përmes një përgjigje me e-mail thotë se punimet në ndërtimin e ‘Luginës së Diellit’ janë duke shkuar në përputhje me dinamikën e paraparë.

Mirëpo, banorët e lagjes Kroi i Vitakut të cilët për vite me radhë u penguan në rindërtimin e shtëpive të tyre po kërkojnë që të ndalet ndërtimi në këtë lagje.

Përfaqësuesit shqiptarë në veri thonë se punimet e stopuara për momentin pritet të vazhdojnë. Ndërkaq Qeveria e Kosovës ka thënë se tashmë ka dërguar inspektorët e saj atje për të parë se çfarë po ndodh, derisa ka garantuar se nuk do të lejojë të ndërtohet asgjë që është në dëm të Kosovës.

Fillimi i ndërtimit të këtyre shtëpive ishte parë si ndryshim i gjeografisë etnike dhe tendencë për një ndarje territoriale të Kosovës në të ardhmen.

© KOHA. Të gjitha të drejtat janë të rezervuara.