Pritet të fillojë verifikimi i viktimave të dhunës seksuale gjatë Luftës Çlirimtare të Kosovës

14 Shtator 2016 - 18:17      

Së shpejti fillon procesi i njohjes dhe verifikimit të statusit të viktimave të dhunës seksuale gjatë Luftës Çlirimtare të Kosovës, sipas ministrit të MPMS, Arban Abrashi.

Ai sot ka pritur në dy takime të ndara përfaqësuesit e UN Women në Kosovë të udhëhequr nga Flora Macula, si dhe Chrystele Todd nga Iniciativa për Parandalimin e Dhunës Seksuale në Konflikte pranë Ministrisë së Punëve të Jashtme të Mbretërisë së Bashkuar, transmeton Koha.net.

“Në dy takimet trajtuam hapat e ndërmarrë deri më tani nga MPMS lidhur me procedurat për njohjen dhe verifikimin e statusit te viktimave të dhunës seksuale gjatë Luftës Çlirimtare të Kosovës, si konkursi tashmë i shpallur për anëtarët e Komisionit Qeveritar për njohjen dhe verifikimin e statusit të viktimave të dhunës seksuale dhe themelimin e Zyrës Përkrahëse administrative që do të asistojë Komisionin Qeveritar”, ka shkruar Abrashi.

Ai në fund ka thënë se janë pajtuar për nevojën që Kosova më në fund të largojë stigmën e padrejtë ndaj viktimave të dhunës seksuale të luftës dhe t’u ofrojë atyre drejtësinë e munguar, proces ky që fillon shumë shpejt.

© KOHA. Të gjitha të drejtat janë të rezervuara.