Yagcilar informoi ekspertin e BB për projektet e MAP-it

14 Shtator 2016 - 15:18      

Ministri i Ministrisë së Administratës Publike, Mahir Yagcilar priti ekspertin e sektorit publik të Bankës Botërore, Gregory Kisunko, me të cilin diskutuan për prioritetet dhe projektet aktuale të Ministrisë së Administratës Publike.

Ata, sipas njoftimit nga ky takim, diskutuan edhe për bashkëpunimin e deritanishëm ndërmjet Ministrisë së Administratës Publike dhe Bankës Botërore. Ministri Yagcilar foli për projektet e MAP-it, të cilat janë duke u zbatuar, siç janë: Procesi i klasifikimit të vendeve të punës në shërbimin civil, Katalogu i vendeve të punës dhe standardizimi i përshkrimeve të detyrave të punës, Procesi i vlerësimit në punë për nëpunësit civilë, Procesi i planifikimit të personelit në shërbimin civil e të tjera.

Në këtë takim ministri Yagcilar foli edhe për zhvillimin e Sistemit të menaxhimit të burimeve njerëzore, ku, siç tha ai, janë zhvilluar trajnime të zyrtarëve për përdorimin e SIMBNJ-së dhe vlerësimin e rezultateve të punës.

Gregory Kisunko e përgëzoi ministrin për punën e bërë deri më tash dhe për suksesin e arritur për vendin, në njërën anë, kurse në anën tjetër, ministri falënderoi përfaqësuesin e BB-së për vizitën e realizuar në MAP.

© KOHA. Të gjitha të drejtat janë të rezervuara.