Daçiq në NAM me mision parandalimin e njohjeve të Kosovës

13 Shtator 2016 - 13:31      

Zëvendëskryeministri i parë dhe Ministri i Jashtëm serb, Ivica Daçiq do të drejtojë delegacionin serb në samitin e 17-ë të Lëvizjes së Shteteve të Painkuadruara (NAM).

Ai do të udhëheq edhe delegacionin serb në takimin e datave 15-16 shtator të ministrave të Jashtëm të NAM-it.

“Në fjalimin e tij në samit, Daçiq thuhet se do të paraqes qëndrimet e Serbisë në rolin dhe aktivitetet e NAM-it, si dhe në çështjet prioritare për Serbinë që fokusohen në Kosovën dhe Metohinë”, thuhet në njoftimin për media të ministrisë së Jashtme serbe, raporton Koha.net.

Serbia në Lëvizjen e Shteteve të Painkuadruara, të përbërë nga 120 shtete, ka status mbikëqyrësi.

61 nga 86 shtete e botës që nuk e kanë njohur Kosovën janë shtete anëtare të NAM-it.

“Rrjedhimisht, objektivi kryesor i delegacionit do të jetë të luftojë presionin dhe lobimin në favor të pavarësisë së Kosovës”, thekson komunikata.

Lëvizja e Shteteve të Painkuadruara është një grup me struktura jo fikse, ku aktualisht bëjnë pjesë 120 shtete. Aktualisht ajo është organizata më e madhe pas OKB-së. Anëtare janë shtete si India, Kuba, Malta, Koreja e Veriut, Iraku dhe Egjipti. Shumica e shteteve anëtare janë shtete aziatike dhe afrikane në zhvillim ose në ekspansion. 25 shtete e themeluan këtë organizatë në vitin 1961, me iniciativën e Jugosllavisë. Atëherë, organizata kishte synim luftën kundër imperializmit, racizmit dhe armatimit. 

© KOHA. Të gjitha të drejtat janë të rezervuara.