Prishet koronarografia, 600 pacientë në pritje të saj [video]

12 Shtator 2016 - 21:35      

Hapat e ngadalshëm të zyrtarëve që drejtojnë sektorin e shëndetësisë kanë bërë që qytetarët të presin me muaj për të marrë një shërbim shëndetësor.

Ndonëse ka kohë që prishja e koronarografit ka bllokuar pothuajse në tërësi punën në kardiologjinë invazive, drejtues institucionesh nuk kanë ndërmarrë ende masa për një zgjidhje të shpejtë, raporton KTV.

Krejt çfarë është punuar nga stafi i klinikës është përpilimi i listës nga të interesuarit për të bërë një ekzaminim të tillë, e cila përfshin rreth 600 qytetarë që presin.

Përveç qytetarëve është Ministria e Shëndetësisë, institucioni që është duke harxhuar shuma të mëdha për të mbuluar shpenzimet e pacientëve për të marrë këto shërbime jashtë institucioneve publike.

Zyrtarë të QKUK-së janë në procedurë të pritjes së një vlerësimi nga ekspertë ndërkombëtarë nëse mund të riparohet koronarografi aktual.

Ndërkaq, Ministria e shëndetësisë nuk është e interesuar për të riparuar atë, por thotë se zgjidhje do të bëjë përmes marrëveshjes për modernizimin e shërbimeve kardiologjie. 

© KOHA. Të gjitha të drejtat janë të rezervuara.