Besimtarët islamë, me mesazhe paqeje për festën e Kurban Bajramit [video]

12 Shtator 2016 - 19:47      

Myslimanët në tërë vendin janë duke kremtuar festën e Kurban Bajramit.

Si çdo vit, ceremonia qendrore e faljes së namazit të bajramit u bë në Xhaminë e Madhe në kryeqytet, raporton KTV.

Besimtarët kishin filluar të grumbullohen qysh pas faljes së namazit të mëngjesit.

E deri pak para faljes së bajramit, atyre ligjëratë për rëndësinë e festës së Kurban Bajramit u ka mbajtur profesori i Medresesë “Alaudin” në Prishtinë, Samir Ahmeti.

Kur ora shënoi 6:49, qindra besimtarë të mbledhur në këtë xhami filluan faljen e namazit, të prirë nga kryeimami i BIK-ut, Sadri Bajgora.

Pas faljes së Namazit, Bajgora ka porositur që në këtë ditë të bekuar të bashkohen të gjithë zemrat e myslimanëve dhe të ndihmojnë njëri-tjetrin.

Ai u kërkoi besimtarëve që sot të mos shohin vetëm sofrën e tyre, por të jenë zemërgjerë dhe të ndihmojnë ata të cilët sot nuk mund ta kenë të mbushur sofrën.

Ndryshe, këtë vit, për festën e Kurban Bajramit, më shumë se 800 pelegrinë nga Kosova janë duke qëndruar në Mekë dhe Medinë, për të kryer haxhin. 

© KOHA. Të gjitha të drejtat janë të rezervuara.