Deputetja Teuta Haxhiu: Prapë Kosovë prezantohet si etnitet, në vend si shtet

10 Shtator 2016 - 20:42      

Deputetja e Aleancës për Ardhmërinë e Kosovës, që është edhe anëtare e Komisionit Parlamentar për Arsim, Teuta Haxhiu, përmes një reagimi për media ka shfaqur rezervat ndaj Marrëveshjes që Kosova ka bërë me Serbinë për njohjen reciproke të diplomave.

Diplomat që do të njohin Kosova e Serbia do të mbajnë logon e BE-së. Kjo e vë në pikëpyetje ekzistencën e shtetit të pavarur të Kosovës, transmeton Koha.net.

Marrëveshje të tilla e prezantojnë Kosovën si një etnitet autonom, çka është synim edhe i Serbisë, e jo si shtet të pavarur, siç edhe jemi shpallur e njohur nga mbi 100 shtete.

Ndoshta Edita Tahirit dhe Qeverisë nuk i ka mjaftuar se Kosovës ia vendosën një fusnotë, tani edhe kjo për njohjen e diplomave, vetëm me logo të BE-së, e tregon qartë se sa keq janë duke u zhvilluar negociatat dhe se sa dëme, gati të pariparueshme, do të shkaktojnë ato për të ardhmen e Kosovës.

Këto marrëveshje në vend të vlerësimit të “lartë” do të duhej të merreshin si alarm dhe të përçonin porosinë për ndërprerjen e menjëhershme të këtyre bisedimeve dhe rimodelimin e tyre.

Më mirë një ego e shuar shpejt, se sa dëme pa fund për vendin.

E për fund, nuk pritet ndonjë surprizë e bukur nga këto negociata, kur kemi parasysh edhe nivelin e delegacionit të Kosovës, në këto tema shumë sensitive, thuhet në reagimin e Haxhiut. 

© KOHA. Të gjitha të drejtat janë të rezervuara.