Rektori i UP-së shkel premtimet, Kundërkorrupsioni i gjen lëshime në tender [video]

10 Shtator 2016 - 19:18      

Rektori i Universitetit të Prishtinës, Marjan Dema, me të marrë këtë post, pati premtuar se shpejt do të fillonte projektin e furnizimit me pajisje laboratorët e departamenteve të ndryshme në këtë universitet. Por, siç raporton KTV, duket se që në fillim punët nuk kanë shkuar sipas planifikimeve.

Kjo pasi që me të shpallur tenderin për këtë projekt në vlerë prej 120 mijë eurosh, Agjencia Kundër Korrupsionit ka kërkuar anulimin e tij.

Sipas kësaj agjencie, specifikimet teknike për këto pajisje janë bërë në atë mënyrë që t’i përshtaten vetëm prodhuesit “Analytikjena” ose operatorit “Viteko” dhe kështu janë diskriminuar operatorët tjerë konkurrues. Sekretari i Universitetit “Hasan Prishtina” është shprehur se Zyra e Prokurimit e UP-së nuk merret me specifikimet teknike për pajisje laboratorike, por njësia kërkuese, në këtë rast, Fakulteti i Shkencave Matematiko-Natyrore.

Ai thotë se operatorët tjerë që mund të jenë ankuar se u është bërë e padrejtë, kanë ofruar pajisje që nuk janë adekuate me ato çfarë ka kërkuar Fakulteti i Shkencave.

© KOHA. Të gjitha të drejtat janë të rezervuara.