Ankesat e pacientëve ndaj punëtorëve shëndetësorë s’merren seriozisht [video]

9 Shtator 2016 - 21:24      

Mungesa e mjekut në vendin e punës e sjellja jo etike nga stafi mjekësor janë ankesat më të shpeshta të pacientëve, që numërojnë qindra të tilla.

Komisioni etiko-profesional si mekanizëm për të trajtuar këto lëndë përbëhet prej 9 anëtarëve, të cilët po ashtu janë punëtorë shëndetësorë, për çka arsyetojnë vonesën e shqyrtimit të lëndëve, meqë punën profesionale e kanë prioritet, raporton KTV.

Ndërkohë, inspektorati shëndetësor, që së fundmi ka kërkuar një raport pune të komisionit, thotë se vonesat e trajtimit të lëndëve po vonohen me vite, gjë që po u shkakton telashe.

Anëtarë të bordit të SHSKUK-së thonë se shkurtimi i buxhetit për paga e mëditje nënkupton se nuk do të mund të ketë pagë shtesë për anëtarë të asnjë komisioni.

Shemsi Veseli, anëtar i bordit, ka thënë se më problematike e sheh faktin se ky komision ngarkohet edhe për lëndët nga institucionet private.

Në komisionin etiko-profesional për më shumë se një vit janë mbledhur rreth 40 lëndë që janë të natyrave të ndryshme, nga të cilat janë marrë 20 vendime për punëtorë shëndetësorë.

© KOHA. Të gjitha të drejtat janë të rezervuara.