Marrëveshje e re për Transportin Rrugor Ndërkombëtar mes Kosovës e Bullgarisë

9 Shtator 2016 - 10:55      

Ministri i Infrastrukturës, Lufti Zharku, së bashku me një delegacion të fushës së Transportit Rrugor, të udhëtarëve dhe mallrave, po qëndrojnë në Sofje të Bullgarisë me ftesë të homologut të tij, ministrit të qeverisë së Bullgarisë, Yvaylo Moskovski.

Delegacioni kosovar me këtë rast ka nënshkruar marrëveshjen e re për ndryshimin e funksionimit të Transportit Rrugor Ndërkombëtar të udhëtarëve dhe mallrave në mes Kosovës dhe Bullgarisë, rrjedhimisht, shfuqizohet marrëveshja e mëhershme e nënshkruar më 27 qershor 2011.

“Marrëveshja e re rregullon transportin rrugor ndërkombëtar të udhëtarëve dhe mallrave ndërmjet dy vendeve për transportin bilateral, transit me vendet e treta dhe ka për qëllim avancimin e tregtisë dhe të marrëdhënieve ekonomike, duke pasur parasysh mbrojtjen e mjedisit dhe të njerëzve, shfrytëzimin racional të energjisë, shtimin e sigurisë në komunikacionin rrugor dhe lëvizjen e lirë të udhëtarëve dhe mallrave ndërmjet dy vendeve”, thuhet në njoftimin për media të Ministrisë së Infrastrukturës.

Kjo Marrëveshje, sipas MI-së, është mbështetur në ndryshimet e infrastrukturës ligjore të vendeve respektive, e cila ka të bëjë me rregullimin e çështjeve të pagesave rrugore dhe shfrytëzimin e rezervuarve të karburanteve normale të automjetit, të cilat janë ndërtuar nga prodhuesi dhe janë të destinuara për ngasjen e automjetit dhe funksionimin e mjetit motorik, që ndërlidhen me aktivitetet e transportit rrugor të udhëtarëve dhe mallrave, ndërmjet palëve kontraktuese, respektivisht Kosovës dhe Bullgarisë.  

© KOHA. Të gjitha të drejtat janë të rezervuara.