Komisioni Shtetëror për demarkacion s’ka pasur mjaftueshëm komunikim me publikun

8 Shtator 2016 - 19:44      

Lidhja Demokratike e Kosovës ka njoftuar për vizitën që sot kreu i saj, njëherësh edhe kryeministër i vendit, Isa Mustafa, ka pasur me banorët e Rugovës.

Sipas kësaj partie Mustafa në Pejë u takua me dhjetëra aktivistë nga rajoni i Rugovës, lidhur me shënimin e vijës kufitare ndërmjet Republikës së Kosovës dhe Malit të Zi.

“Gjatë takimit, është zhvilluar një bisedë shumë konstruktive dhe përmbajtjesore, ku janë shtjelluar argumente të ndryshme lidhur me procesin e shënjimit të kufirit. Kryetari Mustafa ka dëgjuar të gjitha qëndrimet dhe ka shpalosur angazhimet e Qeverisë së Kosovës për të biseduar me të gjithë qytetarët e interesuar, subjektet dhe përfaqësuesit e organeve lokale e qendrore të cilët mund të kontribuojnë në sqarimin e plotë të procesit të shënjimit të kufirit me Malin e Zi”, thuhet në njoftim.

“Vërejtja më e madhe e të pranishmëve ishte se Komisioni Shtetëror nuk ka pasur mjaftueshëm komunikim me publikun për t’i njoftuar me këtë proces, duke krijuar hapësirë për mos kuptime dhe paqartësi në këtë proces”.

© KOHA. Të gjitha të drejtat janë të rezervuara.