Moti i lig, shkaktar i aksidentit fatal

8 Shtator 2016 - 06:30      

Shkup/Prishtinë, 8 shtator - Një shtetas i Kosovës dhe pesë italianë kanë vdekur nga rrëzimi i aeroplanit privat në afërsi të qytetit të Velesit, në Maqedoni, është konfirmuar të mërkurën, shkruan sot Koha Ditore.

Të martën mbrëma u raportua se në aksident kishin vdekur dy vëllezër nga Komuna e Malishevës, Fazli e Visar Begaj, por, siç kanë konfirmuar për KTV-në familjarët e tyre, Fazliu nuk ka qenë në aeroplanin e aksidentuar fare.
Viktimat në tragjedinë e rrëzimit të aeroplanit janë dhe italianët Francesco Montagnieri, Dario Bastasti Lucca Dape Mule, Angelo Kalegari dhe Ilaria Bertio.

Për shkak të këtij aksidenti Qendra Aeronautike e Kosovës ka anuluar ngjarjen e planifikuar për të mërkurën, hapjen e Klubit aeronautik në Istog, ku është dashur të merrnin pjesë edhe viktimat.

Moti thuhet të ketë qenë arsyeja e aksidentit fatal.
Mediat italiane kanë raportuar se fluturimet e tilla si ky në mes Treviso e Shkupit, me distancë prej rreth 800 kilometrash, kanë qenë të zakonshme për pjesëtarët e këtij aeroklubi (gjerësisht, sot në “Kohën Ditore”).

© KOHA. Të gjitha të drejtat janë të rezervuara.