Aktakuzat e para të Speciales, deri në fund të vitit

7 Shtator 2016 - 19:38      

Kryeprokurori i Task-Forcës Speciale Hetuese Evropiane për krime të UÇK-së ndaj serbeve, të kryera në Kosovë gjatë viteve 1998 e 1999, David Schwendiman, pritet që deri në fund të viti të ngre aktakuzat e para ndaj të dyshuarve për trafikim organesh. Ai ka paralajmëruar një vizitë së shpejti në rajon.

Gazeta “Politika” e Beogradit citon Nemanja Stjepanoviqin nga Fondi për të Drejtën Humanitare, sipas të cilit tashmë janë gati tetë aktpadi ndaj tetë të dyshuarve, transmeton Koha.net.
Stjepanoviq po ashtu ka thënë se informatat mbi të akuzuarit nuk bëhen publike për arsye sigurie.

Kjo gazetë citon po ashtu edhe Fatmir Shehollin, të cilin e cilëson analist politik, sipas të cilit dëshmitarët e mbrojtur kaherë janë transferuar në vendet e Europës Perëndimore dhe Amerikë, prej nga do të vijnë në Gjykatën e Hagës, ku do të zhvillohen proceset gjyqësore për krimet ndaj serbëve.

Sipas kësaj gazete, kryeprokurori David Schwendiman ka thënë se funksioni nuk do ta mbrojë askënd nga ndjekja penale. “Politika” në këtë kontekst përmend Hashim Thaçin dhe Kadri Veselin.

Theksohet po ashtu se kjo gjykatë do të ketë mandat deri më 2025.
Dënimi mçë i rëndë që mund ta shqiptojë kjo gjykatë do të jetë burg i përjetshëm, ndërsa mbajtja e dënimit mund të bëhet në njërin nga shtetet që shfaq gatishmëri për të pranuar të dënuarit. Për këtë vendos kryetari i Gjykatës Speciale.

© KOHA. Të gjitha të drejtat janë të rezervuara.