Komiteti LIBE kundër liberalizimit të vizave për Kosovën pa përmbushur kushtet

5 Shtator 2016 - 17:47      

Komiteti LIBE i Parlamentit Evropian nuk i ka dhënë dritën e gjelbër për fillimin e negociatave të Parlamentit me Këshillin e BE-së për vendimin formal për liberalizimin e vizave për Kosovën.

Raporti i raportueses speciale për liberalizim të vizave për Kosovën, Tanja Fajon, është miratuar nga Komiteti, por u kundërshtua procesi i mëtejmë i liberalizmit të vizave.

Anëtarë të Komitetit LIBE, posaçërisht nga radhët e Partisë Popullore Evropiane, kërkuan tërheqjen votimit për Kosovën, ndërkohë që raportuesja Tanja Fajon, u kërkoi anëtarëve të Komitetit “që t’i japin shansin Kosovës të përmbushë kriteret, duke treguar seriozitetin me votimin për liberalizim të vizave”.

Gjatë diskutimeve në seancë u kërkua që për Kosovën të shtyhet votimi, meqë Kosova nuk ka përmbushur kriteret e paraqitura nga Komisioni Evropian.

Kjo kërkesë u cilësua si e pamundshme nga kryesuesi i seancës, meqë do të komplikonte procedurat e seancës, por u tha se pa marrë parasysh vendimit, në rast se ai do të jetë pro liberalizimit të vizave nga shtetet anëtare, ai nuk do të hyjë në fuqi derisa të gjitha kriteret të konsiderohen të përmbushura.

Kujtojmë se dy kushtet e vëna nga KE janë luftimi i korrupsionit dhe demarkacioni me Malin e Zi.

© KOHA. Të gjitha të drejtat janë të rezervuara.