Beqaj, mosratifikimin e demarkacionit e sheh si perëndim të perandorisë “Pronto”

3 Shtator 2016 - 16:26      

Cilat mund të jenë efektet e zhvillimeve të së enjtes në vendimmarrjen për demarkacionin, nisur nga fakti se vota pro tij mund të nënkuptohet edhe votë për koncesione ndaj Listës Serbe?

Belul Beqaj është politolog dhe konsideron se, nga tani, më vështirë do të kenë ata deputetë që nuk e kanë mbështetur ratifikimin, pasi konsideron se presidenti Hashim Thaçi e kryeministri Isa Mustafa do të bëjnë presion të jashtëzakonshëm ndaj tyre, në mënyrë që t’ua ndërrojnë mendjen.

“Beteja e humbur e së enjtes do të shndërrohet në një fillim të rënies definitive të rolit të pakontestueshëm që e ka pasur veçmas Thaçi. Nga dje, personat kyç të pushtetit kanë marrë goditjen më serioze që shpie drejt perëndimit të perandorisë ‘Pronto’ dhe aleatëve të tyre vasalë”, ka theksuar Beqaj, për Kohën Ditore. “Sa u përket deputetëve mbështetës, pas arsyetimit të kryeministrit pse po e tërheq Marrëveshjen, nëse te ta ka mbetur pak ndërgjegje politike, do ta kenë më lehtë, ngase argumenteve të shumta kundër Marrëveshjes po iu shtohet edhe argumenti i koncesioneve ndaj Listës Serbe, pavarësisht se a është apo jo e vërtetë”. (Më shumë detaje mund t’i gjeni në numrin e sotëm të Kohës Ditore)

© KOHA. Të gjitha të drejtat janë të rezervuara.