AAK: Demarkacioni s’kishte vota, deputetë të mazhorancës dëshmuan përgjegjësi

2 Shtator 2016 - 15:54      

Gjithë respekti dhe lavdi për një shumicë të konsiderueshme deputetësh të shumicës parlamentare, në raport me versionin aktual të demarkacionit.

Ajo çfarë po ndodhë në raport me demarkacionin dhe votën e të zgjedhurve të popullit, edhe nga radhët e PDK-së dhe të LDK-së, dëshmon se demarkacioni nuk është çështje partish e as e kauzave të sajuara, por çështje e përgjegjësisë shtetërore e kombëtare, shkruan Muharrem Nitaj, anëtar i Kryesisë dhe Zëdhënës i AAK-së, transmeton Koha.net.

Isa Mustafa, dje të paktën, e pati shansin të tregohej burrë e të thoshte se po e tërheq Projektligjin për demarkacionin sepse nuk i ka votat për ta kaluar! Justifikimi i tij se po e tërheq për shkak të rrethanave të krijuara, në kohën kur kishte edhe quorum, edhe normalitet në sallë, edhe gatishmëri për votim, ishte ligësi, - shkruan Nitaj.

Tash ka një moment të ri, dhe çdo përpjekje për t’u bërë sikur nuk ka ndodhur asgjë, do të ishte gabim fatal për sponsorizuesit e kësaj marrëveshjeje. Sot është koha për unitet drejt zgjidhjes së demarkacionit, - shkruan Nitaj.  

© KOHA. Të gjitha të drejtat janë të rezervuara.