Mustafa falënderon qytetarët “që s’iu përgjigjën thirrjes për përmbysje të shtetit”

1 Shtator 2016 - 17:54      

Kreu i ekzekutivit kosovar, Isa Mustafa, ka falënderuar qytetarët që siç ka thënë ai, nuk iu bashkuan thirrjes së Vetëvendosjes për përmbysje të shtetit.

“Të nderuar qytetarë, ju edhe sot dëshmuat dinjitetin tuaj dhe përkushtimin për shtetin. Thirrja dhe kërcënimet Lëvizjes Vetëvendosje për përmbysje të shtetit nuk gjeti përkrahjen tuaj. U dëshmua qartë se qytetarët u besojnë institucioneve të kryejnë punën e shtetit dhe jo rrugës dhe dhunës”, ka thënë Mustafa.

“Dëshiroj, po ashtu të falënderoj Policinë e Kosovës për punën e tyre në nivelin më të lartë për të mbrojtur rendin dhe qetësinë publike dhe institucionet e shtetit. Policia sot parandaloi përdorimin e mjeteve të rrezikshme në rrugë dhe në sallën e Kuvendit të Republikës së Kosovës”, ka thënë më tej Mustafa.

Sipas kryeministrit, siguria është përgjegjësi e shtetit dhe e qytetarëve.
“Sot u vërtetua edhe një herë përkushtimi i përbashkët për vendin. Qeveria do të vazhdojë me agjendën e saj evropiane dhe euroatlantike. Qytetarëve do t’ua mundësojmë të udhëtojnë pa viza”.

© KOHA. Të gjitha të drejtat janë të rezervuara.